Ahad Qayum

Tiling boshqa bo'lmasin

Manzil boshqa yo'ling boshqa bo'lmasin
Vatanni sev eling boshqa bo'lmasin
Soxta surat bilan yashama aslo
Tiling boshqa diling boshqa bo'lmasin
Kimniki ko'nglida qora dog'i bor
O'z do'stin ko'rolmay yashar fe'li tor
Hech kimga zarracha bermagin ozor

Tiling boshqa diling boshqa bo'lmasin
Kimga omad kelsa xasad qilmagin
Kimdan omad ketsa g'iybat qilmagin
Yaxshini yomon deb tuhmat qilmagin
Tiling boshqa diling boshqa bo'lmasin
Yo'q joydan bir ig'vo izlamachilar
O'rtani buzguvchi tuzlamachilar

Yomon ko'pdir ikki yuzlamachilar
Tiling boshqa diling boshqa bo'lmasin
Do'sting xato qilsa aytgin yuziga
Ammo aldamagin qarab ko'ziga
Nima gaping bo'lsa gapir o'ziga
Tiling boshqa diling boshqa bo'lmasin
Nasihat aylading sen Ahad Qayum
Kimdir anglamadi anglab yetdi kim
Yolg'on so'zlaguncha jim yashagin jim
Tiling boshqa diling boshqa bo'lmasin