Bildim yo'qchilikdan sinmaydi erkak
Boshiga tosh tushsa chidaydi erkak
Mard yigit cho'chimas dushman zarbidan
Chin do'stlari sotsa yig'laydi erkak
Erkak yig'lamaydi omad ketganda
Erkak yig'lamaydi davlat ketganda
Erkak yig'lamaydi kulfat kelganda
Chin do'stlari sotsa yig'laydi erkak
Yig'lamas to'lganda ko'ngil xonasi
Xotirada yashar g'amning sanasi
Boshida davlati ota-onasi
Uni tashlab ketsa yig'laydi erkak
Sizni sevaman deb quchib bo'yniga
Ertaga shoshilsa o'zga qo'yniga
Va'dasidan kechib qadamin qo'ysa
Bir kun xiyonatning qonli yo'liga
O'zga qo'lin tutsa yig'laydi erkak
O'zga yo'lin kutsa yig'laydi erkak
Yot qo'ynida yotsa yig'laydi erkak
Bugun dasturxonda oshin yesalar
Ertaga birlashib boshin yesalar
Endi sening davring o'tdi desalar
Ichi to'lib ketsa yig'laydi erkak
Deydilar erni er qilar ham ayol
Deydilar qaro yer qilar ham ayol
Ko'chaga chiqqanda g'alvali ro'zg'or
Oyog'idan tortsa yig'laydi erkak
Yaqinlari sochsa zaharlarini
Chang bossa oqibat daftarlarini
Yoru qarindoshlar jigarlarini
Yuraklari qotsa yig'laydi erkak
Do'stlar ostonangga qarz so'rab kelsa
Sen sabab kun ko'rib omadi kulsa
Keyin omonatga xiyonat qilsa
Do'st lavzidan qaytsa yig'laydi erkak
Bilmay xato qilib g'aflatga botib
O'zga yurtda tonglar sog'inchda otib
Bir kun musofirlik jabrini totib
Vatanini tark etsa yig'laydi erkak
Deydilar el dardin kuylar san'atkor
Bilingkim har kimni o'z hayoti bor
Yolg'on mish-mish tuhmat berganda ozor
Og'riqlar ko'paysa yig'laydi erkak
It hurar lek karvon o'tadi sekin
Muxlislar bor uchun yashaymiz lekin
Ko'tarolmay qolib g'iybatlar yukin
Bir kun jondan o'tsa yig'laydi erkak
O'ziga ayondir har kimning izi
Tinglang Abdul Ahad nasihat so'zi
Otasin boshini egsa gar qizi
Bag'ridan qon oqsa yig'laydi erkak
